U·IATTIMGIPAONI
SHILLONG: Meghalaya a·doko manderangni nangchongmotgipa bosturang, jekai merong, to, chini aro uandakgipa ma·manti bosturangni damrang da·o namen rakdugaengahani a·sel manderang neng·nikanirangko chagrongna nangtokengoba, iani bidingo maming ku·rangko on·jaengani gimin South West Khasi Hills a·jani Hynniewtrep A·chik National Movement (HANM), dilgiparangko sing·doataha.
Adita salrangna skangsan, Meghalaya Legislative Assembly-ni Autumn Session-ko ong·atangahachim indiba dilgiparangoni darangba, a·doko manderangni nangchongmotgipa bosturangni dam rakbatengani bidingo sing·dogiparang dongjahachim.
Iani bidingo a·dok sorkari aro dingtang dingtang dilgiparangko sing·doatengon, manderangni nangchongmotgipa bosturang, mongsongbate merong aro cha·ani toni dam rakbatahani a·sel a·doko songdongenggipa manderang aro mongsongbate kangal cholgrirang neng·nikanirangko man·na nangtokengaha ine HANM-ni president Lambokstar Marwein parakataha.
Marwein-ni parakatani gitade, re·anggipa bilsio merong bag-sa ba kg 50-ni dam gong 1200-1300-mangsan ong·aiachim indiba ia bilsiode ia apsan merongko gong 1700-oni gong 1850-mang palskaengahachim.
“Uasan ong·aigija cha·ani tokoba re·anggipa bilsiode litre-prako gong 90-mangsan ong·aiachim indiba da·ode took litre-prako gong 120 brena nangskaengaha. Indide kangal cholgrirangara maikai janggi tangna man·pagen?” ine HANM-ni president sing·doataha.
Manderangni nangchongmotgipa bosturangni dam rakbatengahani a·sel kangal cholgrirang aro salo hajira ka·e cha·paenggipa manderang neng·nikanirangko chagrongna nangtokengon, maini gimin dilgiparang iani bidingo ku·rangko on·na gisik nangjaenga ineba Marwein sing·doataha.
