U·IATTIMGIPAONI
AMPATI: Bangladesh a·songona ro·ong salangenggipa truck garirang walantian bol 150 batpile, Dalu-Garobadha rama gita re·ruraengani a·sel ia rama bilsignini gisepon nosto ong·pilna a·bachengaha.
Dalu-oni Garobadha-ona dakbagipa ramani bakroa kilometer 100-mang ong·a aro bilsigni gittam skangsan ia ramako taridaldal ong·eming manderang, ia rama gita maming neng·nikani gri songre songgabatna man·kuengachim.
Indake ong·genchimoba, ia rama gita walantian Bangladesh a·songona ro·ong salangenggipa truck garirang, bol 150 batpile re·ruraengani a·sel da·o bilsignimangni gisepon ia ramao a·kolrara dake manderang, songre songgabatanio neng·nikanirangko man·skana nangengaha.
Koborko on·ani gitade, ia rama gita ro·ong salruragipa garirangni re·ruraaniko jolo songdongenggipa manderang aro dingtang dingtang dolrang jegaltokahani gimin da·o ia rama gita ro·ong salruraaniko dontongatchengaha.
Ia Dalu-Garobadha ramako Mukul Sangma-chi dilanggipa gitcham Congress sorkarini somoio taridapahachim aro ia ramako BSC company jako ra·e tariahachim.
Ia ramako 2017 bilsio taria matchotenba jinma re·rurana wataha aro uandaken ia rama, Mahendraganj, Purakhasia, Nogorpara, Ampati aro uandakgipa biaprang gita nappakbae Garobadha-ona sokeachim.
Ia ramao Garobadha-oni Ampati-ona dakanggipa remade re·na gita namkalengkua indiba Ampati batangangahaon, ramani obosta namjabatrorobae manderang neng·nikanirangko chagrongtokengaha.
Koborko man·soani gitade, ia ramako taridapna gita tangka paisarangko chamatmanahachim indiba da·o dipet kamrangko a·bachengkujaengachim. Ia ramao weighbridge-rang dongjani a·selba bostu salgipa truck garirang nangana bate bosturangko salrurana man·enga aro uandaken ramarang nosto ong·atako man·skaenga.
“Ia ramara state highway-sa ong·e Metric ton (MT) 12-na komibatesa bosturangko salna man·aiachim indiba ro·ong salruraenggipa truck garirang MT 35-40-rang ong·pile ro·ongrangko salengani a·sel baditaba jarangni gisepon nosto ong·aia,” ine PWD-oni kobor on·timgiparang parakataha.
