U·IATTIMGIPAONI
SHILLONG: Re·anggipa Mongolbar salo, West Jaintia Hills a·jani simao donggipa Lapangap songo, Pnar aro Karbi manderangni gisepo dinggriktaiani ja·man, mikkangchi iandakgipa a·selrang bilongbatangjana gita aro manderangni janggirang gimajana gita iandakgipa a·selrangko Meghalaya aro Assam sorkarirang dolgnian nambate nirokna nanga ine Bristibar salo, a·dokni Opposition Trinamool Congress (TMC) didiataha.
Assam aro Meghalaya a·dokni simarango dolgni manderangni dinggrikanirangko nikna man·rongengani gimin suk ong·gijaniko parakatengon, salgro salaram jol gimikon tom·tome songdongenggipa dingtang dingtang jatrangni gisepo so·sojengjeng ong·aniko ra·bana gita jotton ka·anirang dongenga ine TMC Meghalaya-ni vice president George B Lyngdoh parakataha.
“Iandakgipa a·selrangko an·ching Manipur a·doko nikmanaha aro da·o Assam-Meghalaya a·dokni simaoba iarangko nikna man·enga. Salgro salaram a·dokrango dingtang dingtang jatrangni tom·tome songdong a·chaaniko golmal ka·na maiba chalakki daka gita nikna man·enga. Iandakgipa kamrangko sorkari altuae ra·na nangja aro mikrakbate kamko ka·na nanga,” ine Lyngdoh aganaha.
Lyngdoh-ni parakatani gitade, Manipur a·doko so·sojengjeng ong·anichi bang·a janggirangko gimaatna nanganiara salgro salaram jolna aro a·song gimiknan noksan ong·ani ong·aha aro mikkangchi iandakgipa a·selrang batroroangjana gita ta·raken kamko ka·na nangengaha.
“Angni mol·molanide a·dok damgnini sorkarirangan iandake dingtang dingtang jatrangni gisepo dinggrikanirangko ba ma·sisretgrikanirangko ong·chae dongna on·na nangja maina ja·mano an·ching an·tangtangan sikkimna nangnaba gnang,” ine Lyngdoh aganaha.
Iana skangba, Khasi-Pnar aro Karbi jatrangni gisepo dinggrikanirangko nikna man·aha ine janapatengon, Manipur a·doko jekai Meitei aro Kukirangni gisepo ma·sisretgrikanichi dinggrikanirang ong·aha apsan daken da·o Karbi aro Khasirangni gisepoba dinggrikanirangko nikna man·engaha ine TMC-ni dilgipa parakataha.
“Uni gimin salgro salaram jolo aro a·song gimikon badiaba dolrangsa dingtang dingtang jatrangni tom·tome songdong a·chaaniko golmal ka·na jotton ka·engakon ine nikatna man·enga,” ine Lyngdoh aganaha.
