U·IATTIMGIPAONI
Mawkyrwat: South West Khasi Hills District, Mawkyrwat-oni Km 2 mang chel·aogipa Mawten jolni song damsao, pante bi·sa saksa, skulchini re·bapilmitingo goera gopretao ban cha·enba a·sel ong·gipa biapon siaha.
Ia a·sel mijal salni 1 bajimango Rampharbah song manchao ong·aha, jeon mikka jimbemitingo skulchini re·bapilmiting somoio Mawkyrwat-oni km 7 chel·aogipa Wahsiej songni saksa bilsi 16 ong·gipa Aiborlang Marwein, bol kokkimao chakmitingo rang·gitik mikka kimpretao ban cha·enba a·sel ong·gipa biapon sikamaha.
Skul skigiparangni u·iatani gitade, a·selo ga·akgipa Marwein, Mawten Secondary School-o Class X-o poraiengachim aro Pre-Selection Examination-ko seenba noktangchi re·pilangmitingo ia a·selko chagrongaha.
A·sel ong·ako kobor man·a joljolan police, a·sel ong·gipa biapona daariangaha aro pilak dakna nangarangko dake matchotataha.
Bilsi 16-ni bi·sa, mikka kimpretao ban cha·enba siaha ine Police sandie nikaha. Uandake nokdangni manderangba bi·sani sianio darangniba jak dongja ine nikenba, uni manggisiko post mortem ka·gija uamangna pakwatchina gita Additional District Magistrate-o bi·aha aro uagitan bi·sani manggisiko nokdangni manderangna pakwatataha.
