TURA: Meghalaya Tura-o Tourism department, ICFAI University, aro Ganol Aloe vera aro West Garo Hills-ni Chibrare a·jolrangoni daitoko jako ra·giparang baksa mijal September 30 tariko bang·a pinic cha·ram biaprangko man·chape joljol Swaach Bharat Abhiyaan-ko ba rongtal-antalanirangko dakangaha.
West aro South West Garo Hills-ni Tourist Officer in-charge Ava Shereen O Sangma, Tura ICFAI University Assistant Professors Bryan Boon R Marak aro Ellerie N Arengh, poraigipa chatro-chatri-rang, songni manderang aro Nokmarangko September 30 mijal pringo Tura-oni adita chel·ao donggipa damgni niksenggipa picnic cha·ram biaprangko rongtal-an·talanirangko dakdilangaha. Chibra Ganol eco tourism society-ni memborrang aro noko donggipa namgniko man·giparangko man·chape uamangoni rongtalatani salo bimchipen kam ka·paaniko nikaha.
Pringo senggnang Aloe Vera picnic spot-o program mingsako ong·ataha uno bakko ra·giparang rongtalataha, samtangtang wilwilako rongtale-naljoke rakkina kamko ka·angaha. Program-o rongtale-an·tale dongna aro India-ko rongtale rakkina a·songni songpanggiparangni daito ong·ani bidingo chatro-chatrirangna mikrak-u·iatanirangko dakaha.
Tourist Officer Ava Shereen O Sangma, bakko ra·giparang baksa agangrikao antisao kontagni aro bilsisao konta 100-ko on·e rongtalatna rakbea ong·ja aro an·chingni nokrangko, samtangtangko aro kam ka·gipa biaprangko rongtale rakkina mande sakanti ja·rikna nanga ine agandapaha.
Program-o songni manderangni gisepo ma·sianiko agangrikna cholko on·aha. Tourism aro industry department-ni nokrang PMEGP-ni ning·o chatro-chatrirang adita nokrangona re·angaha. Program-ko samtangtangko rongtale rakkina awareness-ko gipatna daito ong·gipa ja·kuantiko de·na chanchigipa songni committee memborrang aro chatro-chatrirang baksa ku·rachakani baksa matchotataha.