U·IATTIMGIPAONI
TURA: 2005 bilsini September 30 tariko a·sel ong·ani re·anggipa Sonibar salo bilsi 18 gapahaon, ia salo sianggipa sak 9 manderangko gisik ra·na gita dingtangmancha Tura aro Williamnagar-o tom·aniko ong·atangaha.
September-ni 30 tariko Police-rangni goanichi so·ota man·gipa sak 9 manderangko gisik ra·na gita Tura-ni Chandmary aro Williamnagar-ni Rongrenggre-o tom·aniko ong·atangaha.
Bilsi 18-na skang, MBOSE-ni headquarter-ko a·dok sorkarini Shillong-ona ra·jitangna jotton ka·aniko manderangni jegaltokengmiting somoio Tura aro Williamnagar biap damgnion, jegalenggipa manderangko Police-rangni skatang goani a·sel Tura-o sak 4 aro Williamnagar-o sak 5 manderang so·otako man·ahachim. Ia a·sel ong·anio gimik sak 9 manderang so·otako man·angan baksana bang·bea manderang guli nangako man·e saknaanirangkoba man·tokahachim.
Ua apsan salon Baghmara-oba chatro chatrirang aro jolni manderang tom·aniko ong·atengachim indiba ua somoio rang·gitik mikkarang jimbee waahani a·sel manderang noktangtangona re·angpiltokna gita nangahachim aro uandaken Baghmara-o iandake a·sel ong·aniko chagrongna gita nangjahachim.
Indake ong·engon, Sonibar attamo ia salko gisik ra·na gita dingtangmancha Tura-o tom·bimonganiko 30th September Victims Soldarity Forum-ni gita Chandmari kal·chakramo ong·atangaha aro ia tom·anio dingtang dingtang NGO-rang, chatro chatrirang aro ua salo sianggipa manderangni nokdangrangba dongpae bakko ra·angaha.
Ia tom·bimonganio Rev Insting C Marak, Isolni kattarangko jinmana aganprakangaha aro tom·anio NESO-ni Assistant Secretary Manseng A Sangma, GSU-CEC-ni president Tengsak G Momin aro gipinrangba jinmana aganprakangaha.
Ia salo sianggipa manderangko gisik ra·e mande ra·pilskaaniko on·na gita Chandmari kal·chakramo tarie donenggipa cenotaph-o jinma mombatirangko so·angaha.
Apsan daken, Williamnagar-oba sianggipa matgrikrangko gisik ra·na gita dingtang dingtang dolrang nangrimena jinma tom·aniko Rongrenggre kal·chakramo ong·atangaha aro sianggipa manderangko mande ra·pilskana gita jinma mombatirangkoba so·angaha.
