U·IATTIMGIPAONI
SHILLONG: Batanggimin election-rango amako man·e MDA-o bak ong·enggipa manderangna, dingtang dingtang kamrangko on·e koros ong·atengani gimin Voice of the People’s Party (VPP)-ni dilgipa Ardent Miller Basaiawmoit, National People’s Party (NPP)-chi dilenggipa MDA sorkariko matnangataha.
Basaiawmoit-ni parakatani gitade, iandakgipa manderangna chairman, co-chairman aro vice-chairman-ni kamrangko on·ahani a·sel sorkari, jao sakpraknan gong lak 2 batpile koros ka·na gita nangenga aro ian a·dokna gimaani ong·engachim.
Board ge·prakon baditaba sak chairman, co-chairman aro vice chairman-rangko songe MDA sorkari, a·dokni tangka paisarangko bon·atenga ineba VPP-ni dilgipa matnangataha.
MDA-o bak ong·enggipa dolni membor-rangko dakchakna gita sorkari, ia kamrangko on·e tangka paisarangko koros ka·e roenga ineba Basaiawmoit parakataha.
Basaiawmoit-ni talatani gitade, iandake dingtang dingtang board-ni chairman-rangna songako man·gipa membor sakpraknan sorkari, japrakni dormaha baksana, gong 20,000-ni nok para, gong 5000-ni light bill, gong 8500-ni cha chinirang, japrako litre 250 petrol aro Grade-I sorkari officer-rangni man·enga gita TA/DA-rangkoba on·engachim.
“Ia sorkari, MDA-o bakrimenggipa dolni membor-rangko dakchakna gitade indita tangka paisarangko koros ka·e rona man·enga indiba skigiparangni aro home guard volunteer-rangni dormaharangkode on·na man·jaenga. Songadam nokadamrango skul nokrangkoba ia sorkari namdapatna man·jaenga aro health centre-rangoba doctor-rang aro gipin sanna banani cholrangkode on·skana man·jaenga,” ine Basaiawmoit aganaha.
Ia sorkari, rama jal·langrangkoba namdapatna man·jaenga aro kam ka·giparang chu·ongjani a·sel traffic-rangko nirokanioba chu·sokna gita man·jaenga ine janapatengon, ian ia sorkarini ong·gija kamrangna gisik on·anikosa mesokani ong·enga ine VPP-ni dilgipa parakataha.
