U·IATTIMGIPAONI
TURA: Kamgri ong·e dongenggipa A·chik chadamberangna janggi tangani cholrangko on·na man·na gita Garo Hills-ni pilak petrol pump-rangon, joltangni A·chik chadamberangko kamo rakkichina gita A·chik Holistic Awakening Movement (AHAM) didiataha.
“Petrol pump-rango joltangni chadamberangko kamo rakkigenchimode tangka paisarangba a·palchi gimaangjawa aro ia joltangni chadamberangko kamo rakkianichi petrol pump-rangba Garo Hills-o namroro silroroaniko ra·baanio on·gilpana gita man·gen. Joltangni chadamberang, an·tangtangni dormaharangko joltango man·gipa bosturangkosan breaigija joltangtango nanganirangnaba jakkalna man·gen. Uni gimin Garo Hills-ni petrol pump-rango joltangni A·chik chadamberangko kamo rakkianiara chadamberangna janggi tangani cholrangko on·an baksana jolo namroro silroroaniko ra·bana dakchakaniba ong·gen,” ine Bristibar salo, AHAM-ni president Georgeprince Ch Momin parakataha.
Momin-ni parakatani gitade, petrol pump-rango joltangni A·chik chadamberangko kamo rakkianiara chadamberangna janggi tangani cholko on·an baksana namroro silroroaniko ra·bana dakchakanisan ong·aigija, manderangni nanganirangko ma·sie ra·na dakchakaniba ong·gen.
“Joltangni manderangara, manderangni jakkalgipa ku·sik aro daka rikanirangkoba nambate ma·sigiparang ong·ani gimin manderangna dangdike on·anio nambate kamrangkoba ka·na man·gen,” ine AHAM-ni president parakataha.
