U·IATTIMGIPAONI
AMPATI: Sukrobar salo, Tribal Affairs Ministry, South West Garo Hills District Administration aro MBMA baksa bakrime, Artisans Empanelment-ni gnigipa Mela-ko Ampati-ni Farmers’ Market-o ong·atangaha aro ia Mela-ko ong·atanio South West Garo Hills a·jani dingtang dingtang biaprango jakni kamrangko ka·e cha·enggipa manderang, jaktangchi tarigimin bosturangko mesokna aro palna sim·na gita cholrangko man·aha.
Ia Mela-ko ong·atanio South West Garo Hills a·jani Additional Deputy Commissioner aro DRDA-ni Project Director RZD Shira mongsonggipa sokgipa ong·e bakko ra·angaha aro unbaksana ADC YW Momin, Delhi-o donggipa TRIFED Head Office-ni General Manager Col Sayam Kashyap, Guwahati-o donggipa TRIFED-ni Regional Manager Pamthing Keishing aro gipin official-rangba dongpae bak ra·angaha.
Ia Mela-ko a·bachengate on·angani somoio Additional Deputy Commissioner RZD Shira, jinmana aganprakangengon, SWGH a·jao dingtang dingtang jakni kamrangko changgipa sapgipa manderang bang·en dongani gimin uandakgipa manderangna cholko on·na gita ia Mela-ko ong·ataha ine parakataha.
Ia Mela-ko ong·atanio, DCIC-ni Functional Manager Athivan Shira, Soil & Water Conservation-ni ASCO Salsara Sangma, Meghalaya Rural Bank-ni Rajat Nidhi aro gipinrangba dongpae jinmana aganprakangaha.
