U·IATTIMGIPAONI
SHILLONG: Robibar pringwalo, mikkang jimbee waangani ja·man, West Jaintia Hills a·jani Pynthor Langtein songo donggipa nok te·sako a·brioni a·arang rurongbae be·dapeaha aro a·a be·dapako man·e ia nokdangni bi·sa sakgni aro me·chikma saksako man·chape gimik sakbri so·otako man·aha.
A·a be·dapako man·e sianggipa mande sakbriara, bilsi 29 ong·gipa Biangki Phawa, bilsi 25 ong·gipa Pynjanai Ryngkhlem, bilsi 5 ong·gipa Edyfy Ryngkhlem aro bilsi 3 ong·gipa Iwadaroi Ryngkhlem ong·achim.
A·a rurongdapani somoio ia nokdangni manderang gimikan tusitokengachim aro jolo songdongenggipa manderangni parakatani gitade, ia nokko a·a be·dapa bakan songni manderang, nokdangni manderangko jokatna jotton ka·ahachim indiba jokatna gita man·jaha.
Indake ong·engon, sigimin manderangni manggisirangko ra·ongkatna man·aha aro pilak nanga kamrangko matchotataha ine police official-rang parakataha.
Jolo songdongenggipa manderangni parakatani gitade, a·a be·dapa man·e sianggipa jiksesara hajira kam ka·e cha·gipa manderangsa ong·achim.
