U·IATTIMGIPAONI
SHILLONG: Re·anggipa Sukrobar walonin dontonggija mikkarang waangani ja·man, Ri Bhoi a·jani Nongpoh-o donggipa National Highway (NH-6) ramako chi banaha aro uandaken Sonibar salode bang·bea garirangan, ia ramao jachange dongna gita nangtokaha.
Ramarango sikkonge dongenggipa chirangko Lumbyrhing songni manderang, sate galna jotton ka·ahachim indiba mikkarang dontonggija waangkuahani a·sel ia rama gita garirang re·na man·gija dongna nangtokaha.
Ia ramara Shillong-oni Guwahati-ona dakanggipa rama ong·e, ia ramao chirang banahani a·sel bang·en gari gorarang jachange dongna gita nangtokaha.
Koborko on·ani gitade, Lumbyrhing songo adita nokrangkoba chi mripaha aro nokrango chi napahani a·sel manderangni cha·ani bosturang aro ma·manti bosturang nosto ong·atako man·tokaha.
Indake ong·engon, ia songo skanggipa changna ia bilsio chi banaha ine Lumbyrhing songni dilgipa Banaijingsuk Khongdup parakataha.
Nalarang gita chirang jokna man·jahani a·selsa ia songo aro ramarango chi banaha ine janapatengon, ta·raken ia ramani nalarangko tarichina aro chi bananichi neng·nikanirangko man·enggipa manderangna dakchakanirangko on·china gita district official-rangko didiataha.