U·IATTIMGIPAONI
RESUBELPARA: Robibar attamo, Assam a·dokni sima jolo donggipa North Garo Hills a·jani Khaldang song sambao mongma chadrapako man·e mande sakgni saknaanirangko man·na nangaha.
Mongma chadrapako man·e saksade bilongkale saknaako man·ahani gimin sanna bananiko ra·na gita Guwahati Medical College & Hospital (GMCH)-ona rimangko man·aha indiba saksade kenna nangaoni joke da·o Resubelpara CHC-on sanna bananiko ra·skaenga ine kobor on·aha.
Forest official-rangni kobor on·ani gitade, Robibar salo ia mongmarang samba jolo donggipa a·brirangoni ong·onbae Assam a·dokchipak re·angengachim indiba uandakmiting somoio sima jolo songdongenggipa manderang, mongmarangko a·rikgalataha. Uandaken ia mongmarang ua jolo re·rame dongengmitingo, ua jolo tarigipa chuni bibako man·e, chu tarigipa biapona re·angaha aro mongmarang ua songona sokangon, songni manderang ua biaponi katpriprana a·bachengtokaha.
Uandakmiting somoiosa ia mongmarang, ua songo tarigipa chuko ringe, skatang re·roroenba manderangko chadrapna a·bachengaha ine Forest official-rang parakataha.
Koborko on·ani gitade, ia mongmarang Khaldang samba jolo donggipa adita nokrangko chadrapaha aro songni mitam manderangkoba chadrapahani a·sel, Meghalaya-ni saksa aro Assam-ni mande saksa saknaanirangko man·aha.
“Saknaa man·gipa mande sakgnioni saksakode Guwahati-ona watatna skang, Goalpara-ona watataha aro da·o uko GMCH-o sanenga. Saknaa man·gipa sakgipin me·chikkode Resubelpara CHC-ona ra·bae sannaniko on·enga aro koborko on·ani gitade ua da·o namkalengaha,” ine North Garo Hills a·jani Deputy Commissioner K Mitali Chandra parakataha.
Ua jolo songdongenggipa manderang, ia a·sel ong·ani ja·man walgimikan kenchipchipe dongna nangtokaha ineba ua parakataha.
Indake ong·engon, mikkangchi iandakgipa a·selrangko chel·chakna man·na gita ia jolrango adita niamrangko ra·gatna ua Goalpara-ni DC baksa agangrikataha ine North Garo Hills a·jani DC parakataha.
