U·IATTIMGIPAONI
TURA: Meghalaya a·dokni SSA skulrango skigiparangna re·anggipa July jaoni September jaona jagittamni dormaharangko on·kujaengani a·sel skigiparang neng·nikanirangko chagrongna nangtokengaha ine All Garo Hills SSA School Teachers Association (AGHSSASTA) parakatenba, SSA skulrango skigiparangna ia jagittamni dormaharangko October 16 tarikni gisepo on·na man·jagenchimode skigiparang, niamo pangchake jingjengatanirangko dakanggen ine mikrakataniko on·angaha.
Iani bidingo a·dokni Chief Minister Conrad K Sangma-na sedoatengon, SSA skulrango skigiparang July jaonin okumu chake kamtangtangko ka·enga indiba da·alonan skigiparangna jagittamni dormaharangko on·kujaenga ine AGHSSASTA-ni dilgiparang parakataha.
“SSA skulrango skigiparang jagittamni dormaharangko man·tokkujaengani a·sel dedrangni skul fee-rangkoba on·na man·tokkujaenga aro chingoni mitamrangde Hindu toromko bebera·giparang ong·e da·o Pujani somoirangonaba tarisamsotokna nangpaengahachim,” ine AGHSSASTA-ni dilgiparang parakataha.
SSA skulrango skigiparangna ia jagittamni dormahako ta·raken on·atchina didiatengon, October 16 tarikni gisepo ia dormaharangko on·na man·jagenchimode skigiparang jingjengatana agre maming gipin cholrang dongjawa ine AGHSSASTA parakataha.
