NGEA-ni jingjengatna manchianiko dontongatpila
U·IATTIMGIPAONI
TURA: Garo Hills Autonomous District Council (GHADC)-o kam ka·enggipa manderangna jagnini dormaharangko on·atahani gimin October-ni 10 tarik dipet jingjengatna manchianiko dontongatpilaha ine Sombar salo Non-Gazetted Employees Association (NGEA)-ni president Brithen Sangma parakataha.
GHADC-o kam ka·enggiparang, an·tangtangni dormaharangko man·gijani ja 31 ong·pilengahani gimin October-ni 10 tarik Mongolbar sal dipet kamrangko dontongate jingjengatna tik ka·ahachim ine nikna man·a.
Indake ong·genchimoba, Sombar salo kam ka·enggiparangna GHADC-ni Executive Committee, jagnini dormaharangko on·atchengahani gimin NGEA-ni jingjengatna manchianiko dontongatpilaha ine u·iataha.
“Beben, jagnini dormahade chingna chu·ongjawa maina chinga indita jarangna gipinrangoniko sro sinamesa nokdang chalaina gita nangaha aro chingni grorangko choton ia jagnini dormahade bon·aignok. Indake ong·genchimoba chinga ia changed jagnini dormahako ra·chengenba, da·o bangki dormaharangna sengkuna gita tik ka·aha. Chingni man·na nangkuenggipa bangki dormaharangko GHADC-ni EC, somoi gita on·jagenchimode chinga mikkangchi jingjengatanirangko dakangkugen,” ine NGEA-ni president parakataha.
GHADC-o kam ka·giparangna ku·rachakgimin 5th pay commission-ko da·onan on·gija 4th pay commission-kon on·kuengani giminba NGEA suk ong·gijaniko parakataha.
