U·IATTIMGIPAONI
TURA: East Garo Hills a·jani Rongjeng-o Rashtriya Uchchatar Shiksha Abhiyan (RUSA)-ni Model Degree College-ko rikahaoba da·onan class-rangko ra·kujaengani gimin Rongjeng-ni dingtang dingtang dolrang, chong·motan FKJGP, GSMC, Mothers Union, AAYF, AHAM, Senior Citizens, Nokmarang aro jolo songdongenggipa manderangba suk ong·gijaniko parakatenba, Rongjeng jolrango donggipa chatro chatrirangni namgnina ia college-o ta·raken class-rangko a·bachengatchina a·dokni Chief Minister Conrad K Sangma-ko didiataha.
Ia Rongjeng Model College-ko RUSA-ni ning·o gong kror 12-na batgipa korosrangchi rikaha indiba college-ko rikanio kamrang adita olgrokahani a·sel ja·manchakatako man·na nangahachim.
Indake ong·engon, ia college-ko da·o rikmanahaoba class-rangko a·bachengskakujaengani gimin jolo songdongenggipa manderang aro dingtang dingtang dolrang suk ong·gijaniko parakatenba, chatro chatrirangni namgnina class-rangko ta·raken a·bachengatchina a·dok sorkariko didiataha.
“Songsalo namroro silroroaninade bida budiko nangchongmota aro ia biapo RUSA-ni Model Degree College-ko rikaniara ia jolrango donggipa chadamberangna nambata lekka poraniko on·na ja·ku de·ani ong·ahachim. Indake ong·genchimoba ia college-o class-rangko da·onan a·bachengkujaengani a·sel bang·bata chatro chatrirang da·o gipin biaprangonasa re·ange poraikuna nangenga,” ine Rongjeng-ni bakrimgimin dolrang parakataha.
Indake ong·engon, ia jolni chatro chatrirangnasan ong·aigija pilakni namgninan ia college-o ta·raken academic session-ko a·bachengatchina gita dingtang dingtang dolrang aro Rongjeng jolni manderang, a·dokni Chief Minister-ko didiataha.