U·IATTIMGIPAONI
SHILLONG: Sonibar salo Shillong songjinmao wa·al kama a·sel ong·aha, jeon saksa mande siaha aro adita konta somoirangna songjinma chu·gimikkon dongdipataha, ramao hajalni hajal garirang jachange dongtokaha.
Janata Furniture building-o 1.15 bajimango wa·al kamaha, wa·al kama a·bachengaoni ta·raken building chu·gimikko kamgopaha, andalgope wal·ku chadoaha. Wa·al kamani a·sel wal·ku chadoako Shillong songjinma gimiko nikna man·aha.
A·sel ong·ao saksa mande siaha ine East Khasi Hills SP Sylvester Nongtnger, koborna u·iataha.
Uandake a·sel ong·gipa biaponiko adita sak manderangko naljokataha. Mikrontangchi a·sel ong·ako nikgiparangni aganani gitade, adita ge cylinder-rang gopretaha jeni a·sel obosta bilongbataha.
Fire service personnel-rang aro defence force-ni team, buildingo wa·al kamako kimitna kam ka·angaha.
Fire brigade-ni a·sel ong·gipa biapona dakchakna sokangaon rama jolo dokan dakgiparangni a·selba ramako tongtong re·na neng·nikako man·aha, jeni a·sel wa·al kamgipa biapona sokna ru·utaha, uni gimin Police Bazar-ona re·gipa chu·gimik ramako champengataha. Aro emergency-ni garirangko ta·rake watna man·aha.
Indiba ramako konta 6 bate somoina champengate donanio songjinmao namen so·sojengjeng ong·skaha. Trafic-ko dontongatani gimin manderang aditan neng·nikako man·tokaha.
Police Bazar-ni chu·gimik jolkon, DC office-oni no entry zone dakataha, bang·a garirang, scooty, bikerang ramao jachange dongtokaha. Laban, Barik, Civil Hospital, Rhino point aro dingtang dingtang jolrangon garirang jachange dontokaha. Scooty, bike-mangmang napsepna man·jaha. Bang·a manderang konta 2 baten traffic-o jachange dongtokaha.