U·IATTIMGIPAONI
TURA: East Garo Hills a·jani Rongjeng jolrango songdongenggipa manderangni chagrongna nangenggipa dingtang dingtang neng·nikani aro nangnikanirangko u·iatna gita A·chik Holistic Awakening Movement (AHAM) Rongjeng unit, a·dokni Chief Minister Conrad Sangma-na sedoataha.
Rongjeng jolrango ka·enggipa Jal Jeevan Mission (JJM)-ni kamrangni gimin janapatengon, JJM-ni namgnirangko songni manderang man·china gita chi tengkirangko name tarichina aro chi pipe-rangko name sale on·china gita AHAM, Chief Minister-ko didiataha.
Nangchakegipa department-rang aro contractor-rang, JJM-ni niamrangko ja·rikjaengani a·sel bang·a nokdangrangan chirangko man·tokjaenga ineba AHAM Rongjeng unit matnangataha.
Ia jolrango mitam PMGSY ramarangko matchotchipgija donenga ine matnangatengon, 2019 bilsio NH-42E-oni Rongdu Dabit-ona tarigipa, 2014 bilsio NH-127B-oni Gandual songona tarigipa aro Chikal Songma songo tarigipa PMGSY ramarangko matchotchipgija donahani a·sel songni manderang neng·nikanirangko chagrongna nangenga ine AHAM Rongjeng unit parakatenba, ia ramarangko matchotate on·china sorkariko didiataha.
Rongjeng-oni Mangsang gita Adokgre-ona dakanggipa ramani bidingo janapatskaengon, ia ramako 2017 bilsion tarina a·bachengatahachim indiba da·alonan ia ramako matchotchipkujaenga ine AHAM Rongjeng unit, suk ong·gijaniko parakatenba, ia ramako ta·raken matchotatchina Chief Minister-ko didiataha.
Indake ong·engon, Rongjeng CHC-o saksa senior doctor-ko songe on·china, Rongmil robol kal·chakramko ta·rake tarichina, jolo donggipa LP aro UP skulrangko namdapatchina gitaba AHAM Rongjeng unit, Chief Minister-ko didiataha.
