U·IATTIMGIPAONI
SHILLONG: Khasi ku·sikko Constitution-ni Eighth Schedule-o napatchina dabiengon, da·o Khasi ku·sikko Meghalaya a·dokni official language dakchina gita Khasi Authors Society (KAS), a·dok sorkario dabiangskaaha.
Da·o Meghalaya a·doko English ku·sikkosa official language dake jakkalengachim aro Khasi, Garo ku·sikrangkode associate official language dakesa jakkalskakuengachim ine nikna man·a.
Indake ong·engon, Sombar salo KAS-ni membor-rang, a·dokni Chief Minister Conrad K Sangma-ko grongenba, Khasi ku·sikko a·dokni official language dakchina didie, dingtangmancha memorandum-ko on·angaha.
Chief Minister-ko grongeani ja·man kobor ra·timgiparangna talataniko on·angengon, Meghalaya a·doko minggni ba minggittam official language dongna man·aiani gimin Khasi ku·sikko English baksana official language dakchina Chief Minister-ko didiaha ine KAS-ni president DR Nonglait parakataha.
Khasi ku·sikko Eighth Schedule-o napatchina dabienggipani gimin janapatskaengon, iani bidingo a·dokni Chief Minister, re·baenggipa antio Union Home Minister-na sedoatna gita ku·rachakaniko on·ataha ine Nonglait parakataha.
“Da·o dipet Khasi ku·sikko a·dokni associate official languade dakesa jakkalengkuani gimin Khasi ku·sikko a·dokni official language dake ra·gatna Meghalaya Language Act 2005-ko taridapchina chinga Chief Minister-ko mol·molaha,” ine KAS-ni president aganaha.
Garo ku·sikko a·dokni official language dake ra·gatani gimin sing·on, a·doko official language-ko ra·gatna maming champenganirang dongja aro minggni ba minggittam ku·sikrangko official language dake ra·gatna man·aigen ine Nonglait parakataha.
Nonglait-ni parakatani gitade, Khasi ku·sikko a·dokni official language dake ra·gatchina dabienggipani bidingo Chief Minister, cholrangko nienba ja·kurangko de·na ku·rachakaniko on·ataha.
