U·IATTIMGIPAONI
SHILLONG: Re·baenggipa 2024 bilsini Lok Sabha election-na dingtang dingtang political dolrang kamrangko ka·sotokengahaon, Tura Lok Sabha constituency-o susana gita Congress dol, Gambegre-ni MLA Saleng A Sangma-ko candidate-na seoknaba gnang.
Meghalaya Pradesh Congress Committee (MPCC)-ni president Vincent H Pala-ni parakatani gitade, Congress dolni mitam chadambe dolrang, Saleng Sangma-ko Tura Parliamentary seat-na candidate dake seokchina nangnikengon Congress dolni mitam me·chik dolrangde, Williamnagar-ni gitcham MLA Deborah C Marak-ko susaatna nangniktokskaengachim.
“Tura Parliamentary seat-na candidate-ko seokani bidingo chanchirimna gita chinga December jao Garo Hills-ona re·anggen aro jeba party tikitko man·china pilakan apsan nangrime election-na kamko ka·gen,” ine Pala parakataha.
Tura Parliamentary election-rango Purno A Sangma-ni nokdang baksa susagiparangoni Deborah Marak-mangmangsan Sangma-ni nokdangko chena sigipa ong·aiachim maina gipin susagiparangde Sangma-ni nokdang baksa susaanio maming daken sokrikpajahachim ine nikna man·a.
Indake ong·genchimoba, Saleng Sangma-ba Congress dolo napangani ja·man, Garo Hills-ni bidingo ku·rang on·batgipa ong·e Garo Hills-o da·o niksengbatgipa dilgiparangoni saksa ong·skaengachim.
Da·o dipet Congress dolni candidate-rangko tik ka·kujaenga talataniko on·angskaengon, ia changode Garo Hills-o Tura Lok Sabha seat-ko chena gita MPCC rakbee kamrangko ka·na nanggen ine Pala parakataha.
Candidate-rangko seokna gita AICC da·oba dorgastorangko ra·kujaenga indiba a·songni dam 4-5 a·dokrango ong·enggipa Assembly election-rang matchotahaon candidate-rangko seokna gita dorgastorangko ra·na a·bachenggnok ine MPCC-ni president parakataha.
