U·IATTIMGIPAONI
TURA: South Garo Hills a·jani Gasuapara jolo Higher Secondary School Leaving Certificate (HSSLC) centre-ko kulichina gita Garo Students Union (GSU) Gasuapara unit, a·dok sorkario dabiangaha.
Iani bidingo GSU Gasuapara unit-ni dilgiparang, a·dokni Education Minister Rakkam A Sangma-na memorandum-koba on·ataha.
Education Minister-na sedoatgipa memorandum-o GSU Gasuapara unit-ni parakatani gitade, Gasuapara jolo poraienggipa chatro chatrirang, 2012 bilsionin West Garo Hills a·jao donggipa Dalu Government Higher Secondary School-osa HSSLC porikkako setokenga indiba ia skulrangara South Garo Hills a·jani ning·osa ga·akani gimin ia skulrangna dingtang porikka sechakani centre-ko nangchongmotengahachim.
HSSLC centre-ko Gasuapara Higher Secondary School-o kulichina didiatengon, ia skulara adhoc ba sorkarichi chalaienggipa skulba ong·ja aro ia skulko management committee-sa chalaiengani gimin skul fee-rangba namen rakenga ine GSU Gasuapara unit-ni dilgiparang parakatenba, ia skulko ta·raken jako ra·china sorkariko didiataha.
Polytechnic institute-ko rika matchotgija galchipahani giminba GSU Gasuapara unit, a·dok sorkariko sing·doataha.
GSU Gasuapara unit-ni parakatani gitade, ia institute-ko 2019 bilsio rikna a·bachengahachim indiba ia institute-ko rika matchotgijan kamrangko donchipaiahachim.
