U·IATTIMGIPAONI
SHILLONG: Meghalaya a·dokni dingtang dingtang biaprango niam gri toll gate-rangko kulie, bostu salruragipa garirangoniko niam gri kajina gile ra·enga ine matnanganirangko knasona man·engon, a·doko niam gri toll gate chalaianiko a·dokni Cabinet Minister aro United Democratic Party (UDP)-ni dilgipa Paul Lyngdoh-ba raken jegalataha.
Ramarango niam gri toll gate-rangko chalaienga ine NPP aro UDP dolrangni gisepo matnanggrikanirangko nikna man·engani gimin Lyngdoh-ba niam gri chalaienggipa toll gate-rangko raken jegalataha.
Meghalaya a·doko badita dam niam gri chalaienggipa toll gate-rang donga ua an·tangde name ma·sija ine janapatengon, niam gri chalaienggipa toll gate-rangko chipchina a·dokni Cabinet Minister didiataha.
Meghalaya a·dokni dingtang dingtang biaprango niam gri chalaienggipa toll gate-rangko chipchina UDP, a·dok sorkari aro KHADC-ko didiatengon, adita salrangna skang Mawlai Mawiong-o donggipa KHADC-ni forest check gate-o niam gri tangka gile ra·anina rim·ako man·gipa mitam manderangara UDP-na kam ka·giparang ong·a ine KHADC-ni CEM Pyniaid Sing Syiem matnangatskaahachim.
