SHILLONG: Shillong songjinmao Sukrobar salonin Durga puja manianiko a·bachengataha. Manderang dal·a chonarang gimikan jinma kusi ong·bee manitokenga. Sonibar saloba manderang gital gital nitogipa ganding-chindingko gane puja pandal-rangona ong·kattokaha.
Ia bilsi a·doko ge 243 community Durga puja aro ge 11 private Durga puja donga, jekon ge 123 East Khasi Hills, ge 11 Jaintia Hills, ge 116 Garo Hills-o donga. Shillong-o darang Durja puja committee-rangan Jubilee-ko mania dongja indiba Garo Hills, Bhaitbari DPC, Platinum Jubilee-ko manigen. Tura Shiv Mandir DPC, Silver Jubilee-ko manigen.
CPC, dingtang dingtang programrangko ong·atna tarisoaha. Jeoni mingsa mingsingbatgipara Drum-beat Competitions ong·a, jekon Robibar salo pring 10 ata bajioni Rilbong Puja Pandal-o ong·atgen. Chegipana tangka aro medal-ko on·gen.
CPC/Puja Committee aro District Civil & Police Administration-ko Durga puja maniako tom·tome matchotatna nirokna gita donaha. District Police Administration, gimik Durga puja pandal-rangona police -rangko nirokna gita wataha.
Iarangna agreba gimik Durga Puja Committee, an·tangtangni volunteer group-ko Identification mark (ID card) baksa nirokna gita wataha. Aro Traffic Police-na dakchakna gita donaha. Jedakode ramao traffic maming neng·nika gri jokna man·gen.
Uandake mite galani salo CPC, galram biap Ghat Polo, C.S point, 4th Furlong Junction aro dingtang dingtang biaprangona sak 100 volunteer-rangko watgen.
CPC’s Annual “ SARAD SANMAN AWARD 2023-ko Shillong-oni sak 8 manderangna on·anggen. Shillong songjinmaosan ong·aija, a·dokni gimik district-rangona Hindu-rang uamangni ia dal·begipa Durga Puja-ko kusi ong·bee manitokenga.
