U·IATTIMGIPAONI
SHILLONG: National People’s Party (NPP)-ni state president aro Rajya Sabha-ni MP WR Kharlukhi, kam watangani ja·man, NPP-ni national vice president aro a·dokni Deputy Chief Minister Prestone Tynsong-ko NPP-ni gital state president songskaaha.
Tynsong an·tangba state president songaniko ra·chakaha aro uandaken Mongolbar salo, uko NPP-ni gital state president songaniko NPP-ni dilgiparang, Shillong songjinmani NPP office-o jinmana parakataha.
Iani bidingo NPP-ni national president aro a·dokni Chief Minister Conrad K Sangma-ba social media-o parakatengon, Mongolbar salo state president-ni kamko Prestone Tynsong, WR Kharlukhi-oniko ra·rikskaaha ine janapatenba, bilsi 16-na Meghalaya a·dokni state president ong·e dangdike on·angahani gimin Kharlukhi-ko mittelpilataha.
“NPP-ni gital state president Prestone Tynsong saksa state politics-ni bidingo ma·sigimin dilgipa ong·e da·o Kharlukhi-ni jakoniko ra·e dilangskagnok. Uni dilanichi Meghalaya a·doko aro salgro salaram jolo NPP-ni miksonganirangko chinga chu·sokatna ka·dongenga,” ine Sangma parakataha.
