U·IATTIMGIPAONI
SHILLONG: A·songni ming 38 ku·sikrangko Constitution-ni Eighth Schedule-o napatanio A·chikkukoba man·chapatchina didina November-ni 3 tariko, Meghalaya Assembly-ni Speaker Thomas A Sangma aro Tura-ni MP Agatha K Sangma, Garo Hills-ni dilgiparangko New Delhi-ona dilange, Union Home Minister Amit Shah-ko grongena sienga.
A·songni ming 38 ku·sikrangko Eighth Schedule-o napatchina dabianio A·chikkukode Home Affairs Ministry nichanggalahani gimin Garo Hills-ni dingtang dingtang dolrang aro dilgiparang suk ong·gijaniko parakattokahachim ine nikna man·a.
Indake ong·engon, A·chikkukoba Eighth Schedule-o napatchina didina gita November-ni 3 tariko Garo Hills-ni dilgiparang New Delhi-ona re·angenga aro iana uamang somoiko tik ka·atsomanaha ine a·dokni Cabinet Minister aro NPP-ni ku·wattimgipa Marcuise Marak, kobor ra·timgiparangna parakataha.
“Chinga iani bidingo Amit Shah-ko November-ni 3 tariko grongegen aro chinga Home Secretary-ko grongna gita somoiko tik ka·atsomanaha. New Delhi-ona re·ange Union Home Minister-ko grongeanio A·chik Literature Society-ni dilgiparang aro Garo Hills-ni gipin dilgiparangba dongpae bak ra·anggen,” ine Marak parakataha.
September jao, Union Home Minister-ko grongna jotton ka·ahaoba cholrangko man·jaha ine janapatengon, November-ni 3 tariko, Tura-ni MP Agatha Sangma, Assembly-ni Speaker Thomas Sangma aro ALS-ni dilgiparang baksa uamang Home Minister-ko gronge, A·chikkukoba Eighth Schedule-o napatchina didigen ine Cabinet Minister aro Williamnagar-ni MLA parakataha.
Ming 38 ku·sikrangko Eighth Schedule-o napatna manchianio ma·mong sorkari, Khasi ku·sikkode man·chape A·chikkukode watchanggalskaengachim ine nikna man·a.
