U·IATTIMGIPAONI
SHILLONG: Meghalaya a·doko 108 ambulance service-ko chalaina dakkanio badiaba dolrangna mikkang niteanirang dongenga ine matnanganirang ong·engon, 108 service-ko chalaina dakkienggipa company-rangko skatang matnanggrike dongaijachina aro namgipa bewalko mesokchina gita a·dokni Health Minister Ampareen Lyngdoh didiataha.
Iani bidingo kobor ra·timgipa manderang baksa agangrikengon, a·doko 108 service-ko chalaina seokanio maming dongnue daka dongja aro company-ko seokanio tender committee-sa kamrangko nirokenga ine Sombar salo Health Minister parakataha.
108 service-ko chalaina dakkienggipa dolrangni gisepo susagrikanirang ong·enga aro gimikan an·tangtangkosa kranikbattokenga ine janapatengon, Meghalaya a·doko uamang maiba man·e cha·ani kamrangko ka·na re·baenga ong·ja indiba a·doko songdongenggipa manderangna nambatgipa emergency service-ko on·nasa re·baenga ine Lyngdoh, gisik ra·atpilaniko on·angaha.
“108 service-ko chalaina dakkienggipa company-rangni jegrikanirangchi sorkari maming dakeba bringbrangataniko man·jawa aro uamangni gisepo jegrikeba maming namgnirangko man·jawa,” ine Lyngdoh aganaha.
Batanggimin somoirangoba 108 service-ko chalaianio neng·nikanirangko chagrongna nangaha ine janapatengon, iandakgipa kamrangna ua maming dakeba dongnue kamrangko ka·na man·jawa ine Health Minister parakataha.
108 service-ko chalaina dakkienggipa dolrangko sorkari, uamangni kamrangko niesa seokgen ine talatangskaengon, 108 service-ko chalaina seokako man·gipa company-ni mongsonggipa daitoara, manderangna nambatgipa kamko on·anian ong·gen ine Lyngdoh parakataha.
“Chief Minister, minister-rang aro chinga pilakan a·dokni manderangna nambatgipa emergency ambulance service-ko on·na sikenga. Block ge·antion chinga gital kolrang donggipa ambulance-rangkosa nangenga,” ine Lyngdoh aganaha.
Seokani kamrangko matchotna on·china dakkienggipa company-rangko didiatengon, media-rangona re·ange matnange roaigija tender committee-onasa re·ange an·tangtangni nangani aro neng·nikanirangko aganchina gita Health Minister didiataha.
