U·IATTIMGIPAONI
WILLIAMNAGAR: Re·anggipa Sombar salo, a·dokni PHE Minister Marcuise N Marak, Tuberculosis (TB) sagiparangna, Community Support ba Nikshay Mitra-ni ning·o be·enna namgipa cha·ani bosturangko East Garo Hills a·jani Nengmandalgre songo suale on·angaha.
TB sagiparangna be·enna namgipa cha·ani bosturangko suale on·angani somoio PHE Minister aro Williamnagar-ni MLA, jinmana aganprakangengon, India sorkarini ra·gatgipa Pradhan Mantri TB Mukt Bharat Abhiyan-ni bidingo talatanirangko on·angenba, District Tuberculosis Centre-ni dakchakanichi pilak nanga bosturangko suale on·enga ine TB sagiparangko jajrengjachina gita ku·pattianirangko on·angaha.
TB saaoni ta·rake nampilna man·na gita samrangko somoi gita ringjringchina aro rongtal an·talaniko rakkichina gitaba ua TB sagipa manderangko didiangaha.
Ia tom·anio, Williamnagar Tuberculosis Centre-o donggipa MO-TC-ni Senior Medical & Health Officer Dr SR Marak, ia program-ko ong·atani bidingo jinmana talate on·angskaaha.
Ia program-ko ong·atanio dongpae jinmana aganprakanggipa gipin manderangara, East Garo Hills a·jani Deputy Commissioner Vibhor Aggarwal, DM&HO Dr Ivory A Sangma, District Tuberculosis Coordinator Sengchrang B Marak aro gipinrang ong·a.
