U·IATTIMGIPAONI
SHILLONG: Jal Jeevan Mission (JJM)-ni ning·o Meghalaya a·dok gimikni lak 5 nokdangrangna chi pipe-rangko Krismasna skangan sale on·na gita a·dokni PHE department ka·dongenga.
“Krismasna skangan lak 5 nokdangrangna chi pipe-rangko sale on·na man·gen ine division ge·antini engineer-rangan angna ku·rachakaniko on·manaha. Iani bidingo anga official-rang baksa tom·e chanchirimaha aro iakon chinga chu·sokatna miksongenga,” ine a·dokni PHE Minister Marcuise N Marak parakataha.
Da·o dipet Meghalaya a·doko JJM-ni kamrang 62.12% matchotmanaha aro uan East Garo Hills a·jao 80.43 percent, South West Garo Hills-o 79.30 percent, Ri-Bhoi a·jao 73.63 percent, North Garo Hills-o 69.88 percent, Eastern West Khasi Hills-o 69.97 percent, South Garo Hills-o 65.61 percent, South West Khasi Hills-o 66.59 percent, West Garo Hills-o 60.31 percent, West Khasi Hills-o 58.71 percent, West Jaintia Hills-o 51.28 percent, East Khasi Hills-o 50.70 percent aro East Jaintia Hills-o 44.50 percent ong·enga.
PHE Minister-ni parakatani gitade, JJM-ni kamrangko 2024 bilsini January 26 tarikon matchotatna gita ma·mong sorkari nisanko donmanahani gimin a·dok sorkariba, ma·mong sorkarini dongimin nisan gita kamrangko matchotatna krengenga.
“Kam matchotgimin project-rangoni mitamko anga an·tangan re·ange niaha aro ua biaprango kamrangko namen ka·aha,” ine Marak aganaha.
Badiaba badiaba biaprangode JJM-ni kamrangko name ka·ja ine matnanganirangko ku·chakangengon, “Matchotgimin kamrangko anga an·tangde aganenga ong·ja indiba ian JJM-ni dashboard-o janapanikosa anga aganenga,” ine PHE Minister aganaha.
“Matnanganirangde dongaigen indiba na·simang biaprangchi re·ange nigenchimode bang·bata biaprangon manderangni chi man·aniko nikna man·gen,” ineba ua aganaha.
