U·IATTIMGIPAONI
SHILLONG: Meghalaya a·doko sorkariko dilenggipa National People’s Party (NPP)-ni gital state executive committee-ko songaha.
Iani bidingo kobor ra·timgiparangna u·iatengon, an·tangko NPP-ni state president songahani gimin a·dokni Deputy Chief Minister aro NPP-ni state president Prestone Tynsong, NPP-ni national president aro a·dokni Chief Minister Conrad K Sangma-ko mittelpilataha.
NPP-ni ia gital state executive committee, dingtang dingtang kamrango chu·sokaniko ra·bana man·gen ineba ua an·tangni ka·dongchakenganiko parakataha.
Prestone Tynsong baksana ia gital state executive committee-o songako man·gipa manderangara, vice president-na Timothy D Shira (Deputy Speaker), Comingone Ymbon (Cabinet Minister) aro Sosthenes Sohtun (MLA), working president-na Marcuise N Marak (Cabinet Minister), Wailadmiki Shylla (MLA) aro Hamletson Dohling (gitcham Minister) ong·a.
Ia gital state executive committee-ni ku·wattimgipana gitcham MLA HM Shangpliang-ko songaha aro executive membor-rangara MLA-rang, chairman-rang, deputy chairman-rang, ADC-ni CEM-rang, Dy CEM-rang, me·chik aro chadambe dolrangni president-rang ong·skagen.