U·IATTIMGIPAONI
SHILLONG: Ia bilsio Cherry Blossom Festival-ko Robibar salo matchotatengani gimin dingtang dingtang dolrang jegaltokengon, ia festival ba manianiko ong·atanichi a·dokna man·dapanirangko ra·bana Tourism-ko tang·doatnasa ong·atenga aro ia festival-ko ong·atanio darangkoba gilja re·aniko ba maiba toromni kam ka·anirangko champengade ong·jaenga ine Sukrobar salo, Leader of Opposition (LO) ba Opposition dolrangko dilenggipa Ronnie V Lyngdoh, talataniko on·angaha.
“Iako an·ching dingtang dingtang dake nina nanggen. Darangkoba toromni kam ka·anirangko ba gilja re·anikode champengjaenga aro ia manianio bak ra·na sikgipa manderangde jeba bak ra·na man·aia. Darangkoba ia manianiona re·bae bakko ra·na nanggen ine draenga ong·ja,” ine Lyngdoh aganaha.
Ia Cherry Blossom Festival-ara, a·doko Tourism-ko tang·doatna gita dingtangmancha gipin biaprangoni re·baenggipa Tourist-rangna miksonge ong·atenggipa program-sa ong·a ineba talataniko on·angaha.
“Basakobade an·ching a·dokni namgnirangkoba nina nangao ga·aka. Ian biaptangni tourist-rangna ong·atenggipa program-de ong·ja indiba gipin biaprangoni re·baenggipa tourist-rangna miksonge ong·atenggipa festival-sa ong·a. Bang·bata manderangan Sukrobar sal dipet antini bon·angachibarasa jakgitel ong·battokani gimin iandakgipa program-rangko antini bon·angachibara ong·atosa an·ching manderangko bang·bate salbana man·a,” ine Lyngdoh aganaha.
Meghalaya a·doko kajina bikotna cholrang indita bang·jani gimin tourism-an a·dok sorkarina kajina man·na gita nambatgipa chol ong·a ineba ua aganaha.
“Oe beben, an·ching toromni bebera·anirangkoba ja·rikna nanga indiba bang·bata mondolirangon attamni 3:00 bajiode giljarang jokmantokaha. Ia festival-ko salgni ong·atgenchimode gipin biaprangoni re·bagipa manderangba suk ong·bate iandakgipa festival-rango an·sengna cholrangko man·paa,” ine Oppostion dolni dilgipa aganaha.
Cherry Blossom Festival-ko Robibar salo matchotatenganina dingtang dingtang dolrang jegaltokahani giminan sorkari, Robibar salode ia festival-ni program-ko attam 3:00 bajionisa a·bachengatchina ge·etanikoba on·manahachim ine nikna man·a.
