U·IATTIMGIPAONI
TURA: A·chik a·songni badiaba badiaba biaprango manderang, Aadhar-ko soitan-ni ‘666’ nomborsa ine ma·sisretenba, Aadhar-na biming segattokjaengani gimin Tura-ni MDC Bernard N Marak, suk ong·gijaniko parakatenba, ian mandeko ma·sina gita mobile nombor, Election Photo Identity card (EPIC) aro roll nombor-rang gita dake unique identification nombor (UIN)-san ong·aia ine talataniko on·angaha.
“Ian manderangni namgnina aro sorkarini kamrango nambate dangdike on·na man·na gita ra·gatgipa nombor-san ong·aia aro ian mandeni bebera·ani ba jokataniode maming nangchakeani dongja,” ine Marak parakataha.
Sorkarini on·enggipa scheme-rangko ra·na gita manderang, an·tangtangni bank account-rangko Aadhar card baksa nangdimatna nanga ine talataniko on·angengon, bang·a manderangan an·tangtangni bank account-rangko Aadhar baksa nangdimatjaengani a·selan internet gita tangka paisarangko gamanio uamangni account-rango napjaenga ine Tura MDC parakataha.
“Da·o gita Aadhar nombor-rang dongjani a·selan skang somoirango ong·gija dakgipa manderang, songni manderangna sorkarini on·enggipa namgnirangko aro tangka paisarangko cha·boke ra·na man·aha indiba da·ode Aadhar nombor-rang dongahani gimin iandakgipa manderangni ong·gija dakgipa kamrangko champengna man·gnok. Ia sal somoirango, ma·mong sorkarini NREGA, PMAY, Pension, NRLM, chatro chatrirangni scholarship aro uandakgipa dingtang dingtang man·gnirangko internet gitasa on·engaha. Indiba adita salrangna skang angni block office-rangona re·ange nianio, mitam block-rangode Aadhar gita link ka·e tangka paisarangko gamanio chu·sokjaenga aro bang·a manderangan an·tangtangni account-rangko Aadhar baksa nangdimatkujaenga ine angna u·iattokaha,” ine Marak parakataha.
Je manderangan an·tangtangni man·gnirangko man·jaenga aro mobile phone-rango message-rangko man·soengachim, an·tangtangni bank account-rangko check ka·china aro an·tangtangni Aadhar-ko account nombor baksa link ka·na gita bank-rangko didichina gitaba Marak u·iataha.
“Iana agreba scheme-ni namgnirangko man·enggipa manderang, an·tangtangni KYC-ko on·na nanga aro account-rangba tiny account ong·na gita nangja. Bank-rang knachakjaenga ong·ode, manderang post office-rangoba an·tangtangni Aadhar baksa dingtang account-ko kuliskana man·gen,” ine Tura MDC parakataha.
