U·IATTIMGIPAONI
TURA: Sonibar salo, West Garo Hills a·jani Gambegre C&RD Block-ni ning·o donggipa Chenggapara songo skanggipa changna, 30 Drums Wangala manianiko ong·atangaha aro ia manianiona Chenggapara songonisan ong·aigija Gambegre block-ni ning·o donggipa dingtang dingtang songrangoniba bang·bea manderangan re·bae bakko ra·angtokaha.
Ia 30 Drums Wangala manianio Selsella-ni Bolbokgre Cultural Society, Tura-ni Bosco Ranggore Cultural Club aro Tura-ni Do·kakku Art & Cultural Association dolrang bakko ra·angenba, bol 30 damarangko doke apsan Wangale mesokangaha.
Ia manianio Babelapara constituency-ni MDC Rakesh A Sangma, mongsonggipa sokgipa ong·e bakko ra·angaha aro Chenggapara songo ia 30 Drums Wangala manianiko skanggipa changna ong·atahani gimin organizing committee-ko mittelpilangengon, mikkangchiba ia 30 Drums Wangala manianiko ong·atna gita dakchakanirangko on·angkugen ine ku·rachakaniko on·angaha.
Gambegre constituency-o ua dingtang dingtang program-rangko ong·atna miksonganirang donga ine janapatengon, ua songtangni manderangna name ka·saa aro galna man·jani gimin jolni manderangna kusiniko ra·bana gita namen katchabea ine Sangma parakataha.
Ia manianio, West Garo Hills a·jani ADC Saljong R Marak-ba dongpae bak ra·angengon, ia jolrangoba jatni daka rikanirangko tange rakkina gita iandakgipa Wangala manianirangko ong·atjringna nangenga aro chasing gitalni bi·sarangna jatni daka rikanirangko dakmesokna nangenga ine aganangaha.
Ia 30 Drums Wangala manianio jolni dilgiparangoni saksa Meckenson Ch Marak, A·chikrangni manigipa Wangala maniani bidingo jinmana talate on·angenba, A·chikrangni dingtang dingtang niamrang aro daka rikani bidingo talate on·angjolaha.
