U·IATTIMGIPAONI
SHILLONG: Hynniewtrep Youth Council (HYC)-ni gitcham president Robertjune Kharjahrin, re·baenggipa 2024 bilsini Lok Sabha election-o susana mikonganirang dongengani gimin re·anggipa Sonibar salo, United Democratic Party (UDP)-o napangaha aro uko UDP-ona rimchaksona gita Mawkyrwat-ni UDP office-o dingtangmancha tom·aniko ong·atangaha.
Ia tom·anio, Kharhjahrin-ko Mawkyrwat-ni MLA aro UDP-ni working president Renikton L Tongkhar rimchaksoaha aro tom·anio UDP Mawkyrwat circle-ni president Shainkor Nongsiej aro gipin dilgiparangba bak ra·angtokaha.
Ia tom·anio HYC-ni gitcham president Robertjune Kharjahrin, tom·anio bak ra·giparangna aganprakengon, Mawkyrwat-ni gitcham MLA BB Nongsiej sagini somoionin uni nokdang, UDP baksa nangrimgipa ong·a aro ua dingtang dingtang election-rango, sriksrik UDP-na kamrangko ka·e on·aha ine parakataha.
HYC aro UDP dolgnian ILP, simarango meligrikgijaniko namatani aro uandakgipa dingtang dingtang kamrangni gimin ku·rang on·giparang ong·ani gimin UDP-ona re·baaniara una namen altubegipa kam ong·aha ineba Kharjahrin aganaha.
Hynniewtrep manderangni namgnina ua an·tangko on·kange kamko ka·angkugen ineba Kharjahrin parakataha.
Re·baenggipa bilsini Lok Sabha election-o ua Shillong parliamentary constituency-o UDP-ni tikitchi susana nangnikenga ineba Kharjahrin parakataha.
