U·IATTIMGIPAONI
TURA: South Garo Hills a·jaona dakanggipa National Highway (NH-62) baksana dingtang dingtang rama jal·langrangko tarichipjaengani a·sel, jolni manderangsan ong·aigija South Garo Hills a·jaona re·angenggipa pilak manderangan neng·nikanirangko chagrongna nangtokenga ine matnangenba Sombar salo, Garo Students Union (GSU) Karukol regional unit, jolo songdongenggipa manderang baksa jinma tom·bimonge re·jomaniko ong·atangaha.
Ia public rally-ba jinma tom·e re·jomaniko ong·atani bidingo jinmana talate on·angengon, NH-62 ramako ru·uta bilsirangonin tarichipkujaengani gimin aro Karukol jolrango donggipa bang·a PMGSY ramarangon name tarichipjani gimin suk ong·gijaniko mesokna gita ong·ataha ine GSU Karukol unit-ni dilgiparang parakataha.
“South Garo Hills a·jaona dakanggipa NH-62 aro Karukol jolrango donggipa rama jal·langrangko name tarichipjani a·sel Simsang aro Rongdik chijolni manderang bang·a neng·nikanirangko chagrongna nangtokenga. Uni giminsa da·alo chinga GSU Karukol unit-ni gita, chingni suk ong·gijaniko mesokna gita jolo songdongenggipa manderang baksa jinma re·jomaniko ong·ataha,” ine GSU Karukol unit-ni dilgiparang parakataha.
Mikkangchiba ia rama jal·langrangko tarichipgija donangkugenchimode uamang iana baten bilakbate jingjengatanirangko dakanggen ineba GSU Karukol unit-ni dilgiparang mikrakataniko on·angaha.
