U·IATTIMGIPAONI
TURA: South Garo Hills a·jani Rongara antio gitcham samrangko aro gipin bosturangko palrongenga ine badi ka·anirangko man·soani ja·man Rongara-ni GSU aro FKJGP dolrang, ia antiona re·angenba, ia bazaar antio palenggipa gitcham samrangko aro gipin bosturangko rim·e so·e galaha ine kobor on·aha.
Koborko on·ani gitade, batanggimin sal somoirangonin Rongara antio, gitcham samrangko aro gipin bosturangko palrongenga ine songni manderang badi ka·doangani ja·man, GSU aro FKJGP-ni membor-rang, Rongara bazaar-ona re·ange nion, bazaar antio gitcham samrangko palenga ine nikenba, ia bosturangko rim·aha aro ja·mano ia bosturangko so·e galaha.
Iandake gitcham samrangko aro gipin bosturangko Rongara bazaar-osan palenga ong·ja indiba Garo Hills-ni dingtang dingtang anti cha·ram biaprangoba palenga ine janapatengon, iandake niam gri bading chiwalenggipa manderangko bilakbate nirok sandichina gita GSU aro FKJGP dolrang, sorkari official-rangko didiataha.
