U·IATTIMGIPAONI
TURA: Adita salrangna skang, Jengjal-ni Baljek Airport-o 100 Drums Wangala manianiko ong·atanio dokkan dakgipa manderang, jabolrangko rongtalate donangjahani a·sel ia biapo jabolrara dakako nikna man·aha aro chaktogijagipa bibarangko chakna nangenga ine kobor on·aha.
Ia bilsini 100 Drums Wangala manianiko re·anggipa November 9 tarikoni 11 tarikona Baljek Airport-o ong·atahachim aro ia Wangala manianio dingtang dingtang biaprangoni manderang, dokkanrangko dakna cholrangko man·tokahachim.
Indake ong·engon, Me·gong Festival-koba da·o December jao ia apsan Baljek Airport-o ong·atna siengachim aro uandaken ia Me·gong Festival-ko sokachakenggipa manderang, ia biapko tarisamsona gita nina re·angon, ia Baljek Airport-o jabolrara dake donangako nikeaha ine u·iataha.
“100 Drums Wangala manianiko ong·atgiparang aro ia manianio dokkan dakgipa manderang, jabolrangko rongtalate donangna gisiko nangjahani a·sel ia biapo jabolrara dakako nikna man·aha. Ia biaprango sogimin mi, be·en, ringani aro ma·manti jabolni bibarangan chaktopiljaha,” ine Me·gong Festival-ko sokachakna sienggipa manderang aganaha.
100 Drums Wangala manianiko ong·atanio dam 100-na baten dokkanrangko donatahachim aro ia manianiona dingtang dingtang biaprangoni lakni lak manderang re·bae bakko ra·angtokahachim.
Indake ong·genchimoba, ia manianio dokkan dakgipa manderangni aro ia manianiko ong·atgipa manderangni jabolrangko rongtalate donangjahani gimin Me·gong Festival-ko ong·atna sienggipa mitam manderang suk ong·gijaniko parakattokaha.
