U·IATTIMGIPAONI
SHILLONG: Meghalaya a·doko manderangna ringani chirangko on·enggipa chiring chibisikrangko chel·chakna gita sorkari, Mongolbar salo tom·e chanchirimangaha.
Ia tom·aniko a·dokni Chief Minister Conrad K Sangma dilangaha aro tom·anio PHE, Water Resources aro Forest department-ni official-rangba bak ra·angaha.
Ia tom·aniko ong·atani bidingo a·dokni Chief Minister, social media-o talate on·angengon, Umkhen chiringara South Shillong-ni manderangna ringani chiko on·enggipa chol gita ong·engani gimin Laitkor-ni Wahkdait-o donggipa chibisikko chel·chake rakkina sorkari tik ka·angaha aro ia chibisik samba jolrango an·seng kitaniko champengna cholrangko nigen ine parakataha.
“South Shillong-o ringani chirangko nangdapkuengani gimin Wah Umkhen jolrango donggipa pilak chibisikrangkon chel·chakna gita sorkari, dingtang dingtang gittimni manderang aro dilgiparang baksa agangrikgen. Apsan daken, pilak biaprangon ringani chirangko chu·onga gita on·na department-rang kamko ka·enga,” ine Chief Minister parakataha.
Indake ong·engon, chiring chibisikrangko cabinet minister-rangoni saksa re·ange niaha aro ia chiring chibisikrango an·chengrangko kitengani a·sel chiring chibisikrang nosto ong·atako man·enga ine nikna man·aha ine PHE Minister Marcuise Marak parakatskaaha.
Iandake chiring chibisikrangko chel·chakani bidingo deputy commissioner-rang, jolo donggipa manderang aro dingtang dingtang dolrang baksa tom·e chanchirimgen ineba ia tom·anio tik ka·e donangaha.
Chiring chibisikrango an·cheng kitaniko champengna sorkari miksongengama ine sing·anina aganchakaniko on·angengon, chiring chibisikrangko da·onin chel·chakjagenchimode mikkangchi neng·nikanirangko chagrongna nangbatgen, uni gimin sorkari pilak cholrangkon nigen ine PHE Minister parakataha.
