U·IATTIMGIPAONI
TURA: Meghalaya a·doko chatro chatrirang, scholarship-rangko man·tokkujaengani a·sel neng·nikanirangko chagrongna nangtokengon, chatro chatrirangni scholarship-rangko antisa ba antignini gisepon watatgnok ine Mongolbar salo, a·dokni Education Minister Rakkam A Sangma parakatahani gimin Tura-ni MDC Bernard N Marak mittelpilaniko parakataha.
Chatro chatrirangni scholarship-rangko ta·raken on·china gita Mongolbar salosan Tura-ni MDC, a·dokni Education Minister-na sedoatahachim aro apsan salon Education Minister-ba, chatro chatrirangni scholarship-ko antisa antignini gisepon watatgnok ine parakatskaahachim.
Iani bidingo a·dokni Education Minister-ko mittelpilatengon, chatro chatrirang an·tangtangni college fee aro dingtang dingtang nanganirangko gamna gita scholarship-rangosa pangchaktokenga aro college fee-rangko gamna man·jaode porikkana form-rangkoba gapatna man·jani gimin chatro chatrirangna scholarship-rangara namen nangchongmotgipa ong·a ine Marak parakataha.
“Chatro chatrirangni namgnina ta·raken aganchakaniko on·ahani gimin anga dingtangmancha Education Minister-ko mittelpilna ska aro uni ku·rachakgimin gitan antignini gisepon chatro chatrirangna scholarship-rangko watatgnok ine ka·dongsoenga maina scholarship-rangko man·tokkujaengani a·selan da·o porikkani somoirang ong·engahaoba mitam chatro chatrirangde form-rangko gapatna chol ong·tokkujaenga,” ine Marak parakataha.
Scholarship-ni tangka paisarangko man·soengon, uarangko skatang dake cha·e ringe bon·ataigija an·tangtangni nanganirangna aro mongsongbate college fee ba uandakgipa kamrangnasa jakkalchina gitaba Tura MDC, chatro chatrirangko didiataha.
An·tangtangni bank account-rangko Aadhar nombor baksa link ka·china gitaba Marak, chatro chatrirangko didiataha.
Tiny account-rangko normal account tarichina aro an·tangtangni bank account-rang active ong·e rakkina gita bank-rangona re·ange KYC-ko submit ka·china gitaba Marak, chatro chatrirangko didiataha.
