U·ATTIMGIPAONI
SHILLONG: Meghalaya a·doko, chu·gimikan ramaosa pangchake pilak nangarangko ugitasa ra·baenga, rel garirangko a·doko jegalenga, namgipa rel gari ba mande gatgipa ong·atbo aro rel gari baksa skotongo a·dok sorkari nangdimatna man·jaenggipa da·o project baksa Jaintia Hills-ona ra·angskana chanchianirang nakatengaha.
Bang·a manderangan rel gari ra·baako chu·gimikan jegala, indiba mitamrang a·dokona namgipa rel garirangko ra·baako namnikskaa jeon niam gri manderangni songre songgabatani baksa maming jak dongangpana nangjawa.
Nongpoh-ni MLA, Mayralborn Syiem Sukrobar salo kobor ra·timgiparangna aganangmitingo, a·doko namgipa rel garirangko rimchaksoa, aro ian a·doko songre songgabatanio tangka koros ong·anirang komigen ine janapataha.
“Ian manderangna bilongen dakchakani ong·gen indiba chinga a·dokni jatrangni gamtchatgipa dakbewalrango mikchepe ra·angna ong·jawa,” ine ua aganaha.
Manderangni indigenous-ko chel·chakchina Nongpoh MLA didiangaha, sorkari Inner Line Permit aro Meghalaya Residents Safety aro Security Act-koba ra·galna chanchienga.
“Namgipa rel grirangko nangenga indiba a·dokni indigenous manderangko chel·chakna nangchongmotgipa legislation-rang baksa an·chingni gadang donga,” ine ua agandapangaha.
Project-ni bidingo kam ka·angna stakeholder-rang aro sinjetaniko on·gipa dol baksa agangrikna sokmanaha. Jensomoio Act jekai MRSSA aro ILPA-ko biapo dona man·ahaon a·doko rel garirangko ra·bana chanchigipako sinjetaniko on·gipa dol agangrikanggen ine ua ka·dongsoaniko aganangaha.
Ia railway project-rangna board-ni bidingo sakantian gisik nangna nangenga, manderangni kosako project sinjetna man·jawa ine MLA aganangaha.
Shillong songjinma mongsongbate salgro salaramg a·dokrangni skotong ong·a jeon rel garirangko ra·bana iano kam ka·ani dongja, railway baksa salgro salaramg a·dok gimikni skotong songjinmarangona rel ramako tarie on·angna kam ka·enga, ineba janapataha.
Rel ramako ra·bana man·jana gita Meghalaya a·dokni a·ako on·jaenga aro a·doko pilak nanga bosturangko rama gitasa salbaenga.
