U·IATTIMGIPAONI
Williamnagar: East Garo Hills-ni district headquaters Williamnagar-o mijal pring 11 bajimango dokan ge-3-o LPG cylinder gas joke wa·al kamna nanga ine chanchichipangaha, dokan ge-3-an bon·pile wa·al kamaha.
Ia a·sel ong·a jilani Soil Market biap sepang jolni Rongrenggre HS School sepango ong·aha. Police aro fire department-ni a·sel ong·gipa bipaona sokani ja·man wa·al kamgipa chu·gimikan kimitangna man·aha. Koborrangko man·soani gitade, cha doksan ge-2 aro ge·sa fast food dokan ong·achim uarang cylinder gopretaoni wa·al kamao chu·gimikkon bon·e kamaha.
“Ia a·sel ong·ao darangni saknaani ba mata buiani koborrangko man·soa dongja. Ian LPG cylinder gopretaoni wa·al kamrikrikangaha. Chinga ta·raken wa·al kamgipa kimitangna man·aha,” ine EGH-ni SP Ringrang TG Momin u·iataha.
