U·IATTIMGIPAONI
AMPATI: Bristibar salo, Meghalaya a·dokni State Cancer Society, Ampati Civil Hospital aro South West Garo Hills-ni NP-NCD nangrimenba, Cancer awareness program aro free screening camp-ko Ampati Civil Hospital-o ong·atangaha.
Ia program-ko ong·atanio, State Cancer Society-ni member secretary aro cancer specialist Dr Anisha Mawlong, Cancer sabisina screening ka·aniko ba porikka ra·aniko dakdilangaha aro ia program-o dingtang dingtang songrangoni gimik sak 71 manderang, porikkarangko ra·e nina cholko man·aha.
Ia program-ko ong·atanio Dr Mawlong, jinmana aganprakangengon, a·song gimiko Meghalaya a·dokan cancer saaniko man·batgipa a·dokrangoni damsa ong·enga ine cancer saaniko ma·sie ra·china aro an·tangtangna simsakchina gita manderangko didiangaha.
Seng·gnang porikka ra·e nianichisa Cancer sabisiko sanna gita man·a ine janapatengon, sorkarini pilak sanchakram biaprangon cancer saaniko indin sanna banna gita man·enga ine Dr Mawlong parakataha.
Ia program-ko ong·atanio, Ampati Civil Hospital-ni Medical Superintendent Dr Denisha Momin-ba program-o bak ra·giparangna aganprakangengon, iandakgipa program-ko South West Garo Hills a·jao skanggipa changna ong·atna man·aha ine an·tangni kusi ong·aniko parakangenba, mikkangchiba songo noko donggipa manderangni namgnina iandakgipa program-rangko ong·atangkuchina didiangaha.
