U·IATTIMGIPAONI
TURA: Sukrobar salo, Meghalaya a·dokni State Cancer Society, Tura Civil Hospital aro West Garo Hills a·jani NP-NCD baksa nangrime Cancer awareness program aro free screening camp-ko Tura Civil Hospital-o ong·ataha.
Ia program-ko ong·atanio State Cancer Society-ni member secretary aro cancer specialist Dr Anisha Mawlong, Shillong Civil Hospital-ni ning·o donggipa Cancer Wing-ni Oncologist Dr Farida Momin aro dingtang dingtang medical officer-rang baksa Cancer sabisini bidingo agan-talate on·anirangko dakangan baksana manderangko Cancer sabisina porikka ra·e niangaha.
Ia program-ko ong·atanio Dr Farida Momin, jinmana talataniko on·angengon, Meghalaya Cancer Society-ni gita a·dokni pilak biaprangon cancer sabisini bidingo agan-talate on·anirangko dakan baksana indin porikkarangko ra·e on·enga ine parakataha. India a·songo Meghalaya a·dokan cancer saaniko man·batsranggipa a·dok ong·enga ine janapatengon, manderang ku·sik, gitok, oesophagus ba ku·sikoni okningona dakanggipa bibikrango aro uandakgipa dingtang dingtang biaprango cancer saaniko man·rongbatenga ine Dr Momin talataniko on·angaha.
Ia pilakan a·doko manderangni janggi tangani bewalni a·selan ong·engnaba gnang ine janapatengon, cancer saani chinrangko nienba, seng·gnangan sanna bananirangko ra·china Dr Momin didiangaha.
Cancer saani chinrangko nikgenchimode ta·raken re·bae an·tangtangko porikka ra·e nichina didiatskaengon, a·dokni dingtang dingtang a·jarango sorkari, indin sanna bananirangko on·enga ine Dr Momin parakataha.
Ia tom·anio Tura Civil Hospital-ni Medical Superintendent Dr IC Marak-ba jinmana aganprakangengon, a·jao iandakgipa program-ko ong·atanichi bang·a manderangnan namgni ong·gen ine an·tangni ka·dongchakenganiko parakangaha.
Ia program-o dongpae bakko ra·anggipa gipin manderangara, Garo Hills Division-ni Joint Director Dr Shemida Marak, Tura-ni Additional DM&HO Dr Jakrambal A Sangma, Tura Civil Hospital-ni Oncologist Dr Jeby Marak aro gipin medical officer-rang ong·a.
