U·IATTIMGIPAONI
SHILLONG: Re·baenggipa 2024 bilsini Lok Sabha election-o seokako man·genchimode, Meghalaya a·doko Inner Line Permit (ILP)-ko ra·gatchina dabienggipani bidingo, Tura-ni MP Agatha K Sangma baksa Lok Sabha-o ku·rang on·gen ine a·dokni Cabinet Minister aro Shillong Parliamentary constituency-ni NPP candidate Ampareen Lyngdoh, ku·rachakaniko on·ataha.
“ILP-ni bidingo chinga Parliament-o dekdo ka·gen aro uamang knachaktelna nanggen. Iakosan anga ku·rachakenga, ILP-ni bidingo chinga Lok Sabha-o ku·rang on·gen aro iako chu·sokgipa ong·atna dekdo ka·gen,” ine Lyngdoh, kobor ra·timgiparangna aganaha.
Meghalaya Democratic Alliance (MDA) sorkarini dingtang dingtang dolrang baksa agangrikanirangko ua poraimanaha aro uamangna maiko aganaha ua namen ma·sienga ineba ua aganaha.
“ILP-ni bidingo chinga apsan daken ja·kuko de·angkugen maina chinga jekon dingtang dingtang dolrang baksa agangrikmanaha uoni chinga an·pile katna man·jawa,” ine Lyngdoh aganaha.
Ru·uta bilsirangonin a·doko ILP-ko ra·gatchina gita dabitokengoba da·alonan ILP-ko ra·gatani bidingo Home Affairs Ministry, a·dok sorkarina maming aganchakanirangko on·kujaengachim ine nikna man·a.
Meghalaya a·doko ILP-ko ra·gatchina gita dingtang dingtang dolrang dabiani ja·man a·dok sorkari, 2019 bilsini December 19 tariko, Assembly-o resolution-ko pass ka·e donangahachim.
2021 bilsini February 23 tariko Union Home Minister Amit Shah-ni a·dokona re·baani somoion ILP aro dingtang dingtang nanganirangna a·dok sorkari, memorandum-ko on·atmanahachim.
