U·IATTIMGIPAONI
SHILLONG: Re·baenggipa 2024 bilsio ong·atna sienggipa Lok Sabha election-o Meghalaya a·doko dingtang dingtang political dolrang, an·tangtangni candidate-rangko seokan baksana dingtang dingtang kamrangko ka·chichasotokengahaoba Bharatiya Janata Party (BJP)-de da·onan candidate-rangkoba sandikujaenga aro ma·mongoniba maming u·iatanirangko man·soa dongkujaenga ine kobor on·aha.
“Da·ona kingkingan ma·mongni dilgiparang proposal-rangko bi·ata dongkujaenga, uni gimin chinga darangkoba candidate-na mingata dongkujaenga,” ine Sukrobar salo, BJP-ni state spokesperson Mariahom Kharkrang, kobor ra·timgiparangna aganaha.
Dambonga a·dokrango Assembly election-rangko ong·atengani gimin ia election-rang matchotako ma·mongni dilgiparang sengkuengakon ineba ua an·tangni chanchichipenganiko parakataha.
Shillong Parliamentary seat-na BJP-ni dilgipa aro Cabinet Minister AL Hek-ko candidate-na seokani cholrang dongama ine sing·anina aganchakaniko on·angengon, “Iani bidingo anga songbadrango poraimanaha aro changdokna MLA ong·enggipa AL Hek-ko BJP-ni candidate-na seokgenchimode nambatgenchim,” ine Kharkrang parakataha.
MDA-ni mitam dolrang baksa bakrime apsan candidate-ko susaatani gimin janapatengon, “Skangonin BJP an·tangarisa susaengani gimin ia changoba gipin dolrang baksa bakrime susaani katta dongjawa,” ine BJP-ni state spokesperson aganaha.
Me·chikrangoni saoba namgipa candidate-rang donggenchimode BJP, me·chikrangkoba susaatna kusi ong·aigen ineba Kharkrang parakataha.
Shillong Parliamentary seat-na Voice of the People’s Party (VPP) dolan Ricky J Syngkon-ko candidate dake parakchenggipa ong·ahachim ine nikna man·a.
Uni ja·man, adita salrangna skangsan National People’s Party (NPP)-ba, Shillong Parliamentary seat-na a·dokni Cabinet Minister Ampareen Lyngdoh-ko aro Tura seat-na da·o ong·enggipa Tura-ni MP Agatha K Sangma-ko candidate-na parakatahachim.
