U·IATTIMGIPAONI
SHILLONG: Khasi aro Jaintia Hills a·jarango songdongenggipa manderangna dingtang a·dokko dabiani bidingo da·o dipet United Democratic Party (UDP)-de chanchirima dongkuja ine Bristibar salo, UDP-ni working president Titosstarwell Chyne parakataha.
Iani bidingo kobor ra·timgipa manderang baksa agangrikengon, UDP-ni bipek Garo Hills-oba donga aro batanggimin somoirangode Garo Hills-ni UDP MLA-rangba dongachim ine Chyne parakataha.
“Da·omangba Garo Hills-o UDP namen bilakengkua aro GHADC-oba UDP-ni MDC dongkuenga,” ine ua aganaha.
Dingtang Khasi-Jaintia a·dokko dabianiara Regional Democratic Alliance (RDA)-o UDP baksa bakrimenggipa Hill State People’s Democratic Party (HSPDP)-ni mongsonggipa dabianirangoni mingsa ong·skaengachim ine nikna man·a.
“Dingtang Khasi-Jaintia a·dokna dabiani gimin anga an·tangde bang·e aganna man·kujawa maina chinga iani bidingo dolni gitade chanchirima dongkuja,” ine Chyne aganskaaha.
Indake ong·genchimoba, manderangni namgnina HSPDP-ni dabianirangode UDP-ba bakrimaniko on·aigen ine ua parakatskaaha.
“Chinga HSPDP baksa election-osan ong·aigija dingtang dingtang kamrangoba bakrimna nangenga ine HSPDP-ni president KP Pangniang-ni agananiko anga an·tangba namnikpaa,” ine UDP-ni working president aganaha.
Dingtang Khasi-Jaintia a·dokna dabianio UDP-ba bakrimaniko on·na nanga ine adita salrangna skangsan HSPDP-ni president Pangniang aganahachim ine nikna man·a.
