U·IATTIMGIPAONI
SHILLONG: Re·baenggipa 2024 bilsini Lok Sabha election-o Tura Lok Sabha constituency-oni susana gita Congress dolni candidate-ko tik ka·kujaenga ine Congress dolni dilgipa aro Opposition dolni Chief Whip Saleng A Sangma parakataha.
“Tura Lok Sabha constituency-na candidate-ko seokani bidingo da·o dipet chinga chingni president baksa agangrika dongkuja. Tura seat-nasan ong·ja indiba a·songni gipin Lok Sabha seat-rangnaba da·o dipet candidate-rangko tik ka·kujaenga,” ine Sangma aganaha.
Tura Lok Sabha constituency-o ua an·tangan susaani cholrang dongama ine sing·anina aganchakaniko on·angskaengon, da·o dipet ua an·tangde iani bidingo mamingkoba aganna man·kujawa aro ia pilakan Congress dolko dilenggipa manderangni nangnikani gitasa ong·aigen ine Gambegre constituency-ni MLA parakataha.
“Anga saksa MLA ong·genchimoba anga party-ni namgnirangko aro manderangni nanganirangna kamrangko ka·gipasa ong·na nangenga,” ine Sangma aganaha.
Gipin political dolrang, an·tangtangni candidate-rangko parakatahani gimin uamangba parakatna nanga indake ong·ja ine janapatengon, da·o dipet Congress dol, BCC aro PCC-ni gadangon party-ko bilakatna kamrangko ka·kuengani gimin iarangni giminde chanchia dongkujaenga ine Sangma parakataha.
Meghalaya a·dokni manderang da·oba Congress dolo ka·dongkuenga ine janapatskaengon, election-na skang mitam dilgiparang Congress dolko cha·bokahaoba manderang Congress dolon ka·dongkuenga aro bang·a dilgiparangan Congress dolona re·bapilgen ine Opposition dolni Chief Whip, an·tangni ka·dongchakenganiko parakataha.
