U·IATTIMGIPAONI
SHILLONG: Mongolbar salo, Meghalaya a·dokni Cabinet tom·e chanchirimangenba, dingtang dingtang kamrango adita dingtanganiko ra·bana aro adita niamrangko taridapna gita mingbonga Bill-rangko pass ka·angaha.
Ia Bill-rangoni skanggipara Captain Williamson Sangma State Technical University-na chu·gimik state university-ni gadangko on·na gita ia University-ni Act ba niamo UGC-ni mitam niamrangko on·dapna ordinance-ko pass ka·anian ong·aha.
A·dokni Chief Minister Conrad K Sangma-ni parakatani gitade, Captain Williamson Sangma State Technical University-na chu·gimik state university-ni status ba gadangko on·na gita UGC-ni mitam niamrangko ia Captain Williamson Sangma State Technical University Act-o ra·gatna gita adita niamrangko taridapna nangengani gimin Cabinet, ia ordinance-ko pass ka·aha.
University-ni Act-ko taridapanio, UGC-ni dongimin niamrang, jekai Board of Governors, Board of Governors-ni bimang, Board of Management aro uandakgipa niamrangko ia University-ni Act-o ra·gatanggen ineba Chief Minister parakataha.
Captain Williamson Sangma State Technical University-ni campus-ko da·o tarina a·bachengengahani gimin ia university-ni class-rangko mikkang bilsioni a·bachengatna sorkari ka·dongsoenga ineba Chief Minister parakataha.
Indake ong·engon, Textiles department-o 2015 bilsionin kamrangko ra·taia dongkujaengani gimin ia department-o bilsi batgimin candidate-rangni bilsirangko komiatna gita ia apsan salon Cabinet, Bill-ko pass ka·angjolaha.
Una agreba, West Garo Hills a·jao sorkarini bang·a a·arangon manderang napdrae songdong a·chatokahani gimin a·ani damrangko tik ka·e on·skana gitaba ia salo dingtangmancha Bill-ko Cabinet pass ka·angaha.
Chief Minister-ni parakatani gitade, West Garo Hills a·jao aro mongsongbate Tura jillao sorkarini a·arango napdrae songdonggipa manderang baksa songgigrikanirangko dakna gita iani bidingo West Garo Hills a·jani deputy commissioner, survey-rangko dakenba sorkarina report-ko on·manaha.
Ia apsan salon Cabinet, Meghalaya Civil Defence & Home Guards-ni Service Rules-ko taridapna aro Meghalaya Public Service Commission (MPSC)-ni niamrangko taridapna gitaba Bill-rangko pass ka·angjolaha.
