U·IATTIMGIPAONI
SHILLONG: West Garo Hills a·jani Phulbari-o songgipa 2X50 MVA, 132/33 KV Grid Sub-Station-ko Budbar salo, a·dokni Chief Minister Conrad K Sangma kulie on·angaha aro ia sub-station-ko oprake on·anganio a·dokni Power Minister AT Mondal aro gipin dilgiparangba dongpae bak ra·angtokaha.
Ia sub-station-ko kulie on·anganio a·dokni Chief Minister, jinmana aganprakangengon, batanggimin somoirangoba Meghalaya a·doko bijolirang donggenchimoba pangnan voltage komirongani a·sel manderang neng·nikanirangko chagrongna nangrongani gimin ia jolo dal·batsranggipa sub-station-ko kulianiara ia jolrango bijoli man·aniko dingtangatna dakchakani ong·gnok ine parakataha.
“Ia gital sub-station-ko kulianichi ia jolrangoba da·ode gipinrango gitan voltage-ko apsan daken man·gnok. Ian a·dokni dingtang dingtang biaprango bijoli on·aniko namdapatanio ja·ku de·chakataniba ong·enga,” ine Sangma aganaha.
Ia sub-station-ko kulie on·angani somoio a·dokni Power Minister AT Mondal-ba jinmana aganprakangengon, “Ia sub-station-ko kulianichi West Garo Hills a·jao bijoli chu·onggijaniko namatna man·gnok. Ian ia jolrango bijoliko nambate on·na gita sorkarini kam ka·aniko mesokani ong·enga,” ine parakataha.
World Bank-ni tangka paisarangko dakchake on·anichi North Eastern Region Power System Improvement Project (NERPSIP)-ni ning·o ia sub-station-ko West Garo Hills a·jani a·kawe jolo kulianiara a·doko mongsongbatgipa sub-station-rangoni damsa ong·enga aro ia Phulbari sub-station-ko kulianichi a·kawe jolrango voltage chu·onggijaniko namatna gita ka·dongsoenga ineba Power Minister aganaha.
Ia Phulbari sub-station-ko kulie on·angani somoio dongpae bakko ra·anggipa gipin manderangara, a·dokni Deputy Chief Minister Prestone Tynsong, Tura-ni MP Agatha K Sangma aro gipinrang ong·a.
