U·IATTIMGIPAONI
BAGHMARA: Rongsigre-oni Durabanda-ona tarina on·gipa ramako matchote tarigija kilometre 2.667-kosan matchote tariaiaha ine Nokrek Area Development Committee matnangataha.
Committee-ni u·iatani gitade, Rongsigre-oni Durabanda-ona km 5.203 ong·gipa ramako tarina sorkari PWD (Roads) North Division Tura-ni ning·o gong 7,96,55,000 tangkarangko chame on·ahachim indiba December-ni 19 tariko Nokrek Area Development Committee-ni membor-rang, officer-rang aro songni manderang baksa ia ramako nina re·angon, ia km 5.203 ong·gipa ramaoni km 2.667 ong·gipa bakkosan matchote tariaiaha ine nikna man·aha.
“Ia kamko 97 percent-de matchotaha ine nangchakegipa department a·kangahaoba chingni ia biapona re·ange nion kamrang 40 percent-ni gitasan matchotkuenga ine chinga nikna man·aha aro iako chinga Nokrek Area Development Committee, songni manderang aro jolni Nokmarang raken jegalenga. Ia kamko 2018 bilsini January 4 tariko Tura Fancy Valley-oni Bikash Harlalka, Gaurav Harlalka, MD Construction aro Ram Gopal Harlalka-ni biming-o pakwate on·ahachim aro kamko ja 12-ni gisepon matchotatchina ge·etaniba dongachim. Indiba da·onan 60 percent kamrangde matchotkuja,” ine committee-ni secretary Chegan N Marak parakataha.
Ia ramako metaling aro blacktopping on·e tarichina gitasa work order-o ge·etaniko on·ahachim indiba ramako block-rangchisa ane tariskaaha ineba Nokrek Area Development Committee (NADC) parakataha.
