SHILLONG: Meghalaya a·doko National People’s Party (NPP)-chi dilenggipa Meghalaya Democratic Alliance (MDA) sorkari, a·dokni namroro silroroanina aro a·doko songdongenggipa manderangni namgnina kamrangko ka·ani pal, an·tangtangni man·gni aro an·tangtangni manderangnasa kamrangko ka·enga ine Meghalaya Pradesh Congress Committee (MPCC)-ni president aro Shillong-ni Lok Sabha MP Vincent H Pala matnangataha.
MDA sorkarini kamrangna an·tangni suk ong·gijaniko parakatengon, “Uamangni kamrangni bidingo anga bang·e aganna sikja maina manderang ia sorkarini gisikrangko namen ma·sia,” ine Pala aganaha.
Pala-ni aganani gitade, NPP-chi dilenggipa MDA sorkari, a·dokni namroro silroroani bidingo chanchiani pal an·tangtangni man·dapani giminsan chanchiaigiparang ong·achim.
A·doko ka·enggipa dingtang dingtang project-rangni bidingo janapatengon, ia project-rang pilakan a·doko songdongenggipa manderangna namgni ong·ani pal sorkari minister-rangni ma·drangrangna aro uamang baksa meligipa manderangnasa namgni ong·skaenga ine MPCC-ni president matnangataha.
“Sorkarini project-rangko contract-na on·aniosan ong·aija indiba sorkarini kamrango kam ka·giparangko seokanioba apsan ong·enga maina pilak kamrangkon minister-rangni ma·drangrang aro uamang baksa meligipa manderangsa man·enga,” ine ua aganaha.
Pala-ni aganani gitade, sorkarini ia pilak kamrangkon manderang nie dongenga aro ia kamrangna sorkarikon dai channa sienga.
