SHILLONG: Mawmluh Cherra Cement Limited (MCCL)-ko sorkarini chipatna tik ka·engani gimin Sohra-ni NPP MLA Gavin Miguel Mylliem-ko dos galenba, uko so·ote galna Hynniewtrep National Liberation Council (HNLC) bobil dolni ka·mikkenataniko on·angani ja·man a·dokni police-rang, chel·chakanirangko on·na gita mikrakbate kamrangko ka·na a·bachengataha.
Iani bidingo kobor ra·timgiparangna talataniko on·angengon, Sohra-ni MLA-na chel·chakanirangko on·na gita police-rang, ja·kurangko de·engaha ine a·dokni police officer saksa parakataha.
“HNLC-ni ka·mikkenataniko on·gipani bidingo chinga name nichengenga aro Sohra-ni MLA-na chel·chakanirangko on·na gita chinga nangani kri ja·kurangko de·anggen,” ine police officer aganaha.
MCCL-ko chipna gita sorkarini tik ka·ahani gimin HNLC bobil dol, a·dok sorkarina mikrakataniko on·angenba, iani bidingo Sohra-ni NPP MLA-ko dosi chane, uko so·ote galna ka·mikkenataniko on·atahachim.
MCCL-na a·dok sorkari, gong kror 350-na batpile koros ka·ani ja·manoba tangatpilna man·jahani gimin ia cement company-ko chipatsrangna tik ka·aha ine adita salrangna skangsan a·dokni Chief Minister Conrad K Sangma parakatahachim ine nikna man·a.
MCCL-ko chipna tik ka·engani gimin sorkariko jegalatskaengon, ia company-ko tange rakkianiara sorkari aro Sohra MLA-ni daitoan ong·achim indiba MLA an·tangni constituency-na maming kamrangko ka·na man·jaha ine HNLC, uko kam watchina dabiangahachim.
“MCCL-ko sorkari chipatna manchienga ong·ode Sohra-ni MLA Gavin, an·tangan dosko ra·e kamtangko watna nanggen. Ua kamtangko watna jechakgenchimode HNLC, ukon dosi changen aro jekai ua aro sorkari MCCL-ko manggittang gope gapaha apsan daken chingaba uni kosako ja·kuko de·skagen. Na·simang gita dake manderangko cha·bokgipa mandena siani sastiko on·na kraa,” ine HNLC-ni general secretary aro publicity secretary Sainkupar Nongtraw, adita salrangna skang seachi parakatahachim.
MCCL-ko namdapatna kam ka·ani pal ia cement company-ko chipkamsrangna miksongenganiara sorkarini ong·gija miksonganiko mesokanisa ong·enga ine janapatengon, a·doktangni cement company-ko ra·doani pal ia sokrari, gipin a·dokrangoni gipin jatrangchi chalaienggipa cement company-rangkosa namdapatna jotton ka·skaenga ine HNLC matnangatahachim.
